Журнал ҳақида

ҲАМКОРЛИГИМИЗ — МУАММОЛАР ЕЧИМИГА КАЛИТ

Ўзбекистон Республикаси ўз мустақил тараққиётининг янги — янада шиддатли ва оламшумул босқичига қадам қўйди.

Бу эътироф ва баҳолар бутун дунё жамоатчилиги, оммавий ахборот воситалари томонидан таъкидланиб, тан олинмоқда. Биргина мисол: яқинда Туркиянинг етакчи нашрларидан бири  —
«Derin Ekonomi» журнали Ўзбекистон Республикаси Президенти Шавкат Мирзиёевни ўз мамлакати ва минтақасидаги вазиятлар ўзгаришига сезиларли таъсир кўрсатишга қодир бўлган жаҳоннинг ўн нафар етакчисидан бири эканини эътироф этди.

Бу юртимизда амалга оширилаётган кенг кўламли бунёдкорлик, янгиланишларга хориж жамоатчилигининг иқрори. Унинг замирида қадим халқимиз закоси, асрлар давомидаги заҳматли меҳнати ва, албатта, кун сайин халқ қалбидаги армонларнинг ариётгани қувончи мужассам…

Яна бир йил тарих зарварақлари қатида қолди. Бунда барча соҳаларда бўлгани каби юртимиз ижтимоий ҳаёти, ёшлар таълим-тарбияси ва уларнинг баркамол вояга етишида муҳим ўрин тутувчи маънавият, адабиёт ва санъат, она тили ҳамда хорижий тилларни ўқитиш соҳаларида ҳам оламжаҳон янгиликлар бўлди, десак, муболаға бўлмайди.

Энг аввало, юртимизнинг қарийб барча минтақаларида ёш ижодкорларни қўллаб-қувватлаш, уларни ижод майдонига чорлаш мақсадида таниқли адибларимиз номида — Қорақалпоғистон Респуб­ликасида Ибройим Юсупов, Қашқадарёда Абдулла Орипов, Фарғонада Эркин Воҳидов, Андижонда Муҳаммад Юсуф, Жиззахда Ҳамид Олимжон ва Зулфияхоним номидаги адабиётга, санъатга ихтисослашган мактаблар ташкил этилиб, ижодкорларнинг ёдгорликлари ўрнатилгани эътиборга молик.

Атоқли давлат арбоби ва ёзувчи Шароф Рашидов таваллудининг 100 йиллиги муносабати билан Жиззах шаҳри ва адиб номи берилган туман марказида у кишининг муаззам ҳайкали бунёд этилиб, ибратли ҳаёт йўли ва ижодий фаолиятига бағишланган музей очилди. Унга ёндош ҳолда Жиззах шаҳрида Ҳамид Олимжон ва Зулфияхоним музейларининг ҳам ташкил этилгани ёшларда ижодкорлар хотирасига юксак ҳурмат ва ибрат туйғусини тарбиялашга хизмат қилмоқда.

Шунингдек, қисқа вақт ичида Тошкент шаҳрида Ўзбекистон ёзувчилари уюшмасининг замонавий биноси қад ростлади. У ижод аҳлини халқимизни бун­ёдкорлик ва эзгу ғоялар атрофида бирлаштиришга хизмат қиладиган янгидан-янги юксак асарлар яратилишига ва бу асарларнинг ҳатто жаҳон китобхонлари орасида ҳам оммалашувига қулай шароит яратиши шубҳасиз. Эътиборлиси, Президентимизнинг шахсан ташаббуси ва лойиҳалари асосида Ёзувчилар боғининг барпо этилиши ёшларнинг улуғ адибларимиз ижоди билан яқиндан танишиш, илҳом олишларига хизмат қилаётгани зиёлилар, умуман, фарзанди келажагига умидли ҳар бир ватандошимиз томонидан юксак баҳоланмоқда.

Айниқса, Алишер Навоий номидаги Тошкент давлат ўзбек тили ва адабиёти университетининг янги биноси фойдаланишга топширилиб, илмга ташна ёшларнинг жаҳон стандартлари асосида билим олишлари, она тили ва камида икки, учтадан хорижий тилларни мукаммал ўрганиб, ўзбек номи, бой адабиёти ва санъатини дунёга кўз-кўз қилиши учун барча шароитлар яратилди. Ҳар бир аудиториянинг ўзига хос тарзда энг сўнгги русумдаги ўқув жиҳозлари билан таъминлангани эса ўқитувчи ва талабаларга ўз устида янада кўпроқ ишлаш, ўқиб-ўрганишга куч бағишлади. Университет олдидаги кўркам боғ ва унга салобат бағишлаб турган улуғ мутафаккир, сўз мулкининг султони Алишер Навоий бобомизнинг ҳайкали барчанинг қалбига адиб асарларида тараннум этилган ёруғ ва иқболли кунларга шукроналик, унинг қадрига етиш ҳамда асраб-авайлаш туйғуларини улашаётгандек таассурот уйғотади кишида.

Яна бир эътирофли жиҳат: Алишер Навоий номидаги Тошкент давлат ўзбек тили ва адабиёти университетининг янги биноси очилишига шахсан Президентимиз Шавкат Мирзиёев ташриф буюриб, яратилган шароитларни кўздан кечираркан, устоз ва талабалар ҳаёти ҳамда меҳнат фаолиятига ҳам қизиқиш билдирди ва олий ўқув юртининг йигирма нафарга яқин профессор-ўқитувчиларига Тошкент шаҳрида бунёд этилаётган намунавий уйларнинг калитларини топширди. Бу университет педагогик жамоасини зиммасидаги масъулиятли вазифани бажаришда ташаббус­корлик ва фаоллик кўрсатишга ундагани рост.

Албатта, юқоридаги янгиликларни шунчаки санаб ўтиш билан кифояланиб бўлмайди. Унинг замиридаги мақсад ва эзгу ниятлар яқин пайтда фарзанд­ларимиз камоли, халқимизнинг улкан бунёдкорлик юмушлардаги жипс-муштараклиги ҳамда Ватанимизнинг беқиёс юксалиш одимларида бор бўй-бас­тини кўрсатиб бораверади.

Шу маънода,  Ўзбекистон Республикаси Президенти Шавкат Мирзиёевнинг Олий Мажлисга Мурожаатномасининг ижтимоий соҳани ривожлантириш бўйича устувор йўналишларида таъкидланганидек, «Биз бундан буён ҳам инглиз тили ва бошқа хорижий тилларни чуқур ўқитиш масаласига устувор аҳамият қаратамиз. Шу билан бирга биз учун зарур бўлган мутахассисликлар бўйича таълим олиш ва кадрлар малакасини ошириш ишларини кенг кўламда йўлга қўямиз.

    Бу ҳақда сўз юритганда, айтиш лозимки, биз улуғ боболаримизнинг муносиб давомчилари бўладиган етук инсонларни тарбиялаш масаласига, афсуски, етарлича аҳамият бермадик. Ҳолбуки, интеллектуал ва маданий салоҳиятнинг қандай ноёб бойлик экани, нодир талант эгаларини тарбиялаб камолга етказиш ҳал қилувчи аҳамиятга эга эканини унутишга ҳаққимиз йўқ. Ривожланган мамлакатлар бугунги юксак тараққиёт даражасига айнан шунинг ҳисобидан етгани – бу ҳам ҳақиқат”.

Мамлакатимиз ҳаётидаги бугунги эврилишлар, табиийки, журнал мазмун-мундарижасига ҳам янги эпкинларни олиб кирмоқда. Бу ўз навбатида таҳририят ижодий ходимларига ҳам масъулият юклайди. Зеро, халқимиз маънавий ҳаёти, таълим-тарбия, она тили ва хорижий тилларни ўқитиш, миллий ҳамда жаҳон адабиётидаги ҳар бир янгиликдан ўқитувчи-муштарийларимизни бохабар қилиб бориш – олий мақсадимиз.

Шунга кўра таҳририят ходимлари Халқ таълими вазирлиги буйруғи асосида Қорақалпоғистон Респуб­ликаси, барча вилоят ва Тошкент шаҳрида ташкил этилган “Матбуот кунлари” тадбирларида иштирок этди. Бугунги кунда ушбу юзма-юз учрашувларда муштарийлар томонидан билдирилган таклиф ҳамда тавсиялар асосида Таҳририят йиллик иш режаси тасдиқланди.

Хабарингиз бор, давр талабига ҳамоҳанг равишда ўтган йилларда ўқитувчи ва ўқувчиларда она тили билан бирга чет тилларни ўрганишга қизиқиш кучайди. Бу журнал фаолиятида ҳам ўзгариш ясаб, “Til va adabiyot ta’limi” – “Преподавание языка и литературы” – “Language and literature teaching” номида ягона нашрнинг  ўзбек, рус, инглиз тилларида чоп этилишига хизмат қилди. Аммо журналга кўпгина таълим муассасаларида фақат Филология фанлари методика бирлашмалари орқали обуна ташкил қилинган. Натижада икки ёки уч нафар ўқитувчининг  бир пайтда нашрдан фойдаланиш истаги туғилганда ҳамкасблар ўртасида яхши маънода  журнални “қизғаниш” ҳолати юзага келган экан.

Албатта, бу бир жиҳатдан бизни қувонтирса-да, муштарийлар ўтасидаги ноқулайлик янгича ёндашувга ундади. Яъни билдирилган таклифлар асосида жорий йилдан нашрни Асосий ва Илова шаклида ўзбек-инглиз ҳамда рус-инглиз тилларида чоп этиш режалаштирилди. Бу ўқитувчиларнинг бир нашрга обуна бўлиб, иккита журнални олиши ва зарур ҳолларда алмашиб ўқишига  имкон беради.

Албатта, журналнинг дизайни, ҳажми, тузилиши, чоп этилиш сифати ва ўқувчилар қўлига ўз вақтида етиб бориши билан боғлиқ масалалар доимо эътиборда бўлиб, такомиллашиб боришини таъкидлаш жоиз. Бу борадаги таклиф, тавсия ҳамда мулоҳазангиз бўлса, мурожаатингиздан мамнун бўлишимизни билдирамиз. Зотан, нашрнинг барча учун қулай ва мазмунли бўлишидан ҳамиша манфаатдормиз.

Ҳар бир нашрнинг оммавийлиги ва илмий-методик салоҳияти унинг мазмун-моҳияти, эълон қилинган материалларнинг ўқувчига нечоғлиқ фойдалилигига боғлиқ. Шу боис журналимиз мундарижасини бойитиш муҳим масала. Бунда, аввало, мамлакатимиз маънавий ҳаётидаги янгиликлар, таълим-тарбия, тил ва адабиёт ўқитишдаги долзарб мавзуларни таҳлилий, методик ва илмий нуқтаи назардан ёритиш диққат марказимизда бўлади. Демак, юқорида дастлаб санаб ўтган янгиликлар журналимиз саҳифасини безашини аввалдан маълум қиламиз. Шунингдек, давлатимизнинг юксак мукофот ва эътирофига сазовор бўлган ижодкорлар, ўқитувчи ва ёшлар муваффақияти сирларини қаҳрамонларимиз билан мулоқотлар асосида кашф этиб боришни режалаштирдик. Токи уларга ҳавас қилган ҳар бир юртдошимиз ана шундай эътибору шарафга лойиқ бўлсин!

Шунингдек, журналда «Ёзувчи-шоир дарс ўтганда…», «Таълим-тарбияда инновацион ғоялар», «Дарс­ликка тузатиш», «Маҳорат сабоқлари», «Тўгарак машғулотида» каби янги рукнларда қизиқарли материаллар тақдим этиш назарда тутилаётир.

Хорижий тилларни ўқитишда Британия Кенгашининг Тошкентдаги ваколатхонаси билан ҳамкорликни давом эттирган ҳолда инглиз тилини ўқиб тушуниш билан боғлиқ мавзуларни ёритишни бош­лаймиз. Бу бўйича ҳам таклиф ва муносабатингизни кутамиз. Агарда Сизда фаолиятингизга зарур бошқа мавзуларга эҳтиёж бўлса, таклиф ва мулоҳазаларни йўллашингиз мумкин.

Шу ўринда афсусланарли бир жиҳат: якунланган йилда инглиз тилини ўқитишга доир эълон қилинган қатор рукндаги материалларда муштарийлар ҳамкорлиги (Тошкент шаҳридаги 56-умумий ўрта таълим мактаби инглиз тили ўқитувчиси Озода Галиулинадан ташқари) кутилгандек натижа бермади. Бу таълим муассасаларида фаолият юритаётган муаллимларимизнинг фаол ва ташаббускор эмаслигидан далолат бермайдими?

Журналнинг “Преподавание языка и литературы” иловасида ҳам “Инновации”, “Обсуждаем, спорим”, “Совершенствуем профессиональную подготовку” каби янги рукнлар ташкил этилиб, методик, адабий ва илмий мавзулардаги материаллар эълон қилиниши режалаштирилмоқда. Бунда устувор жиҳат умумий ўрта таълим мактабларида янги ўқув дас­тури асосидаги 10-синфнинг мураккаб мавзулари ёритилишига қаратилади. Ушбу мавзулар бўйича доимий ҳамкоримиз – амалиётчи-педагог, «Йилнинг энг яхши фан ўқитувчиси – 2017» ғолиби, дарслик ҳаммуаллифи  Юлия Мусурманова ва бош­қа фаол муаллифлар кўмагига таянмоқдамиз.

Шу ўринда таҳририят билан йиллар давомида ҳамкорлик қилиб келаётган таниқли тилшунос ва адабиётшунос олимларимиз қаторида ЎзДЖТУ профессори Хадича Муҳитдинова, филология фанлари номзоди Ваҳоб Раҳмонов, Фарғона вилоят ­ХТХҚТМОИ доценти Валижон Қодиров, Алишер Навоий номидаги Тошкент давлат ўзбек тили ва адабиёти университети ўқитувчиси Саодат Қамбарова, Хоразм вилоятидан Адиба Бекчанова, Муқаддас Каримова, Навоий шаҳридан Комила Ражабова, Бухоро вилоятидан Махфурат Отаева, шунингдек, “Преподавание языка и литературы” таҳририяти муаллифлари – Раушан Медетова, Рубен Назарьян, Анотолий Лиходзиевский, Беккенбауэр Реймов, Лариса Ким, Агата Осипова каби кўплаб фаол муаллифларимизга ўқувчилар номидан миннатдорлик билдирамиз!

Умуман, янги йилда янги режа ва лойиҳаларимиз кўп. Бизнинг доимий муштарийларимиз ва ҳамкор-ҳамфикрларимиз сафи янада кенгайиб борса, тил ва адабиёт таълими муаммолари ҳам шунча камайиб боришига ишонамиз.

Демак, ҳамкорлигимиз мустаҳкам ва бардавом бўлсин!

 

 

 

Раҳбарнинг Ф.И.Ш: Жовлиев Баҳодир Ҳасанович

Ташкилотнинг юридик манзили: 100129, Тошкент шаҳри, Навоий кўчаси, 30-уй

Телефон/факс: (99871) 244-04-15, 244-04-18

Веб-сайт: www.tilvaadabiyot.uz

Электрон почта манзили: til_adabiyot@umail.uz, tiladabiyot@mail.ru